Солтүстік Корея билігі жаңа эсминецті суға түсіру кезінде болған оқиғаға қатысты үш лауазымды тұлға қамауға алынды деп хабарлады Солтүстік Кореяның мемлекеттік ақпарат құралдары.
Ким Чен Ын қатысқан 21 мамырда өткен салтанатты рәсім кезінде 5 мың тонналық кеме тепе-теңдік ұстай алмай, нәтижесінде корпусы бүлініп, суға батып кеткен еді.
Ким Чен Ын оқиғаны “жауапсыздық, ғылыми емес тәжірибе және немқұрайлықтан туындаған қылмыс” деп атады.
Солтүстік Кореяның мемлекеттік ақпарат агенттігінің хабарлауынша, эсминец құрастырылған Чхонджин кеме жасау орнының бас инженері, сонымен бірге құрылыс жетекшісі мен әкімшілік менеджері ұсталған. Ресми хабарламада “апат үшін солар жауап беретіні” жазылған.
Оқиғадан қанша адам зардап шеккені белгісіз.
Жаңа құрастырылған эсминец туралы ашық дерек өте аз. Солтүстік Корея оның атын да атамады. Оның сыйымдылығы – 5 мың тонна деп айтылады. Егер оны қалпына келтірсе, ол Солтүстік Корея флотындағы ең ірі екі кеменің бірі болмақ.
- Аталған эсминец кеменің "Чхве Хён" түріне жатады. Жаңа үлгідегі бас кеме сәуір айында суға түсірілген. Жарияланған суреттерге қарағанда, бірінші кемеде үш түрлі 74 зымыранға арналған қондырғы жүйелері, бір 100-130 мм артиллериялық қондырғы, екі алты ұңғылы 30 мм артиллериялық қондырғы, зениттік-зымырандық және артиллериялық жүйе және болжам бойынша, қиғаш қондырғылары бар деп жазды imp-navigator блогы.